بىلىم بىلوگى سىزنى قارشى ئالىدۇ

ئاناڭنى تىللىغان سەنمۇ؟
ئاپتورى:ئابدۇرىھىم مۇھەممەت
 

ئاياپ جوراڭنى قەھرىڭدىن ، ئاناڭنى تىللىغان سەنمۇ؟
يىگىتلىك پەيلى - پەخرىڭدىن ئاناڭنى تىللىغان سەنمۇ ؟
سىنى چوڭ قىلغۇچە رەڭگى سۇنۇپ نە بولسا بولغاندۇ ،
تىنىپ شۇنداقمۇ ئەسلىڭدىن ئاناڭنى تىللىغان سەنمۇ ؟

بالاڭ - پۇشتىڭمۇ شۇ مەزلۇم قولىدا ، قوينىدا ئۆستى ،
گۇۋاھلىق يوقمۇ نەسلىڭدىن، ئاناڭنى تىللىغان سەنمۇ ؟
ئاناڭ تىللانسا رەنجىڭ يوق،ئايالىڭ رەنجىدىن ئەنسىز ،
بولۇپ ئازمىشتا ئەقلىڭدىن ، ئاناڭنى تىللىغان سەنمۇ ؟

ئاناڭدا قەھرى - قەغىش يوق ، قىساس كىملەرنى تىلايدۇ ،
يىنىپ قال ئەمدى پەيلىڭدىن ، ئاناڭنى تىللىغان سەنمۇ ؟

مەنبەسى : شىنجاڭ ئايالىرى 2005-يىللىق 11-سانى